Byw yn yr ardd

Yr adeg yma o’r flwyddyn byddwch yn trawsblannu planhigion ifanc o’r tŷ gwydr i mewn i’ch gardd. Mae’n bwysig iawn eich bod yn amddiffyn y planhigion ifanc rhag pla fel slygiau, brain a cholomennod. Yn y llun yma rwyf wedi rhoi rhwyd dros fresych ifanc a rhoi pelets gwenwyn slygiau o dan soseri.

Mae hi’n gyfle olaf i hau courgettes, marrow a ciwcymber y mis yma.  Mae dau blanhigyn courgettes yn ddigon i fwydo teulu o 4 trwy gydol yr haf heb i chi orfod prynu rhai o ‘r archfarchnad.

Mae’r ffa yn dechrau blodeuo, gyda chnwd cyntaf y flwyddyn i ddod erbyn canol mis Gorffennaf. Dwi’n ffeindio ei bod hi’n well plannu'r rhain yn agos at eu gilydd mewn clwstwr gan eu bod nhw yn dal eu hunain i fyny yn well. O ganlyniad mae llai o chwyn yn tyfu oddi tanynt, syn arwain at lai o waith chwynnu i’r garddwr.

Tatws newydd yn dechrau dangos trwodd. Plannwyd y rhain ar ddechrau  mis Ebrill. Codais bridd dros ei gwreiddiau, mae hyn yn sicrhau fod chi’n cal lai o datws gwyrdd ac mae’r cnwd dipyn gwell.

Mae’r garlleg bron yn barod i’w casglu. Unwaith mae’r dail yn troi’n felyn mae’n adeg cynhaeafu. Edrychwch ar y dail, os mae saith deilen, mae hyn yn dangos fod y bwlb wedi ffurfio yn dda ac mae saith haenen o groen o amgylch y bwlb.

Os nad oes gennych blanhigion tomatos ifanc yn tyfu yn barod, fyswn ni yn argymell chi i brynu rhai yn eich canolfan arddio lleol. Trawsblannwch nhw mewn i fagiau tyfu, ac fe gewch domatos ffres ar gyfer mis Awst hyd at fis Hydref. Amhosib curo blas tomatos yn syth oddi ar y planhigyn sydd wedi cochi yn yr haul.

Trawsblannwch unrhyw blanhigion ifanc allan i’r ardd y mis yma fel y planhigion ifanc blodfresych a corn melyn a welir yn y lluniau.

Teulu’r Aliwms

Rwyf yn mwynhau tyfu planhigion o deulu’r Aliwms (Nionod). Mae’r teulu yma yn cynnwys planhigion fel garlleg, cennin, sialóts, nionod gwyrdd/ gwanwyn, ac wrth gwrs nionod coch a gwyn. Mae manteision i’w tyfu yn cynnwys y canlynol.

1. Maent yn hawdd i dyfu, ac yn blanhigyn sy’n berffaith i dyfu mewn gardd fach gan nad oes angen lot o le arnynt.
2. Mae nhw'n gwrthsefyll afiechydon yn dda iawn, a prin yn methu unwaith maent wedi plannu yn y pridd.
3. Mae rhai mathau yn storio yn dda iawn, hyd at 9 mis, yn bennaf garlleg a nionod.
4. Mae’n bosib cael cyflenwad o gnwd trwy gydol y flwyddyn o nionod yn dibynnu ar y math a dyfir.
5. Mantais arall o dyfu nionod yw bod mwy nag un ffordd bosib i’w hau, un ffordd yw trwy hadau, ag yn ail drwy blannu bylbiau ifanc. Gellir casglu'r hadau o flodyn neu storio bylbiau oddi ar y nionyn i hau'r flwyddyn olynol. Mae nionod gwyrdd yn enghraifft wych o hyn, cadwch y bwlb yn y pridd ac mi rannir y bwlb yn fylbiau llai.